Á föstudaginn kenndi ýmissa grasa. Þá skellti ég mér í dýragarð með öðrum erlendum nemendum. Veðrið lék við okkur, sól og nálægt 30 stiga hita. Garðurinn var mjög fallegur og mikið af áhugaverðum dýrum þarna. Við borðuðum hádegismat í garðinum og var boðið upp á mikla veislu.

Um kvöldið var ég að kenna og eftir kennslu fór ég með tveim nemendum mínum í nudd. Það var frekar sársaukafullt og þurfti ég nokkrum sinnum að biðja nuddarann um að vera ekki svona kröftugur. Ég held líka að líkaminn minn sé ekki í góðu ástandi og nuddarinn sagði það líka við mig að ég þyrfti að hreyfa mig meira. Sem er eitthvað sem ég vill ólmur gera en ekki haft nógu mikinn tíma. Hann Echo, annar nemandinn sem ég fór með vildi kynna mér fyrir "cupping" en þetta er hefðbundin kínversk lækningaraðferð. Það eru notaðir glerbollar, eldur og alkóhól og einhvern veginn búa þeir til þrýsting inní þessum bollum þannig að þegar þeir eru settir á bakið á manni dregst húðin inní bollana. Þetta er soldið heitt og skapar mikinn þrýsting á bakið. Samt ekki neitt voða sársaukafullt. Bollarnir eru á manni í um 10 mínútur og svo teknir af. Eftir standa rauðir hringir á bakinu en allt blóðflæði fer á staðinn þar sem bollarnir eru. Þetta á víst að vera voða gott fyrir heilsuna, gefa fólki meiri orku og koma í veg fyrir sjúkdóma. Hér geturu lesið meira um <a href="http://en.wikipedia.org/wiki/Fire_cupping">Cupping</a>.

Ég og Echo vel bollaðir Ég og Jane Echo er hress

Svo er ég bara búinn að vera að kenna um helgina. Það voru teknar nokkrar myndir í kennslustofunni í dag og sýni ég þær hér.

Allir í stuði! Þessi heitir Augustine og er 18 ára.

Á þriðjudaginn ætla ég að fara með Kim félaga Kóreumanni í tennis en það er spáð góðu veðri á morgun og þriðjudag.

 Annar enskuskólinn sem ég er að vinna hjá heitir Web International. Þetta er með stærri enskuskólum hérna í Ningbo. Það er drulludýrt að læra í þessum skóla og öðrum enskuskólum. Það er því mikið af krökkum að læra þar sem eiga ríka foreldra. Svo eru aðrir sem vilja læra ensku til að eiga möguleika á betra starfi. Það er mikið um alþjóðleg viðskipti hérna í Ningbo og það virðist vera starf sem flestir vilja komast í enda kannski möguleika á góðum launum þar. En ég sem sagt kenni þarna þrjá daga í viku. Mér finnst þetta ekkert sérstakur skóli og oft finnst mér kennsluefnið sem við styðjumst við algjört drasl og leiðinlegt. Ég reyni því oft að grípa til þess að gera eitthvað skemmtilegra með nemendum mínum eins og að spjalla um eitthvað eða fara í leiki. Helsta hlutverk mitt er líka að fá fólk til að tala og að hafa gaman af tímanum. Þetta fólk er að borga mikinn pening fyrir þetta og það er synd ef þetta er svo drulluleiðinlegt. Mér finnst vinnuumhverfið heldur ekkert sérstakt, það er enginn sérstakur mórall í gangi, aðallega af því allir eru svo önnum kafnir. Ég er líka sjálfur yfirleitt önnum kafinn þegar ég er að vinna þar en það kemur fyrir að maður fær smá hvíld og þá spjallar maður við nemendur eða fer og fær sér að eta. Það góða við að kenna þarna er hins vegar að þarna eru margir nemendur og hittir maður nýtt fólk á hverjum degi. Það er því nokkuð auðvelt fyrir mig að kynnast fólki þar sem margir eru áhugasamir um að spjalla við útlenska kennara.

Þetta er annar vinnustaðurinn minn. Allt voða nýtískulegt hjá þeim og allt í gleri. Frekar kalt umhverfi ef þú spyrð mig. Það er mikið af huggulegu kvenfólki þarna (!)

Dagurinn í dag var nokkuð hressandi. Veðrið var eðall, um 27 gráður og sól. Vaknaði klukkan 8:10. Setti í mig brauðhleif og laumaði banana í töskuna mína. Úti beið mín mótorhjólavagn og heilsaði ég ökumanninum og tók unga konan undir stýri vel undir kveðjuna mína. Ég sagðist vilja fara í háskólann í Ningbo og gaf hún til kynna að slíkt væri vel við hæfi. Það er smá labb frá hliðinu að alþjóðlegu byggingu háskólans og naut ég tónlistar úr Ípóði mínum. Gott ef að Michael Jackson kom ekki við sögu í þeirri stuttu yfirferð. Kínversku tíminn var bara nokkuð skemmtilegur í morgun. Ég hafði svo hádegismat með bekkjarfélaga mínum, sem er eldri maður frá Bandaríkjunum. Heimili hans er í Michigan en hann er frá L.A. Hann er fjölskyldumaður, held hann eigi 4 eða 5 börn. Sá var flippaður að fara til Kína að kenna ensku í Norður Kína. Svo ákvað hann að fara til Ningbo að læra kínversku. Þetta er rólyndismaður og á köflum full rólegur á því, eins og skjaldbaka en hann er fínn félagi. Það er mjög fyndið þegar hann talar kínversku í tímum því það líða stundum um 5 sekúndur á milli orða...wo.....qu.....góður. Hann er líka mjög áhugasamur um Ísland. Í hádesgihléinu skellti ég mér svo í klippingu. Ég gat allavega tjáð mig um að ég vildi klippa hárið stutt. Þáði ég hárþvott en skildi ekki mikið í því það sem klipparinn sagði við mig. Þetta var ungur strákur sem talaði ekki ensku. Fæstir gera það hérna. Þetta var hræódýrt. Ég reiddi fram 10 yuan sem jafngildir um 200 kr. Það er ansi margfalt sem maður borgar fyrir svipað á Íslandi! Ég var nokkuð sáttur við klippinguna. Fyrr um morguninn hafði bekkjarfélagi minn boðist til að klippa mig. Sá er lærður klippari en þar sem við höfðum engan stað til að fara á þáði ég bara klippingu á hárgreiðslustofu. Mér fannst hins vegar eftir á hárið mitt enn vera nokkuð þykkt þannig að ég bað kappann um að þynna hárið fyrir mig. Fórum við þá út á skólalóð eftir miðdegistímann og þynnti hann á mér hárið. Voða rómó (!). Honum fanst þetta samt soldið vandræðalegt en mér fannst þetta mjög hressandi sérstaklega þar sem veðrið var svo gott. Þessi gaur er frá Kóreu og talar nánast enga ensku þannig að við tölum saman á okkar fáguðu byrjendakínversku. Það gengur bara ótrúlega vel miðað við aldur og fyrri störf. Ég bauð honum svo upp á hamborgara og svo skildu leiðir. Ég ákvað að ganga heim í góða veðrinu og njóta tónlistar úr Ípóðanum. Ég er oftar en ekki með hann á Sjuffle og ég man allavega að "Supermassive black hole" hljómaði og kom mér í gott sving.

Er heim var komið lagaði ég mér te (blóma og grænt te) og hitaði mér Baozi sem er brauðbolla með sætri fyllingu. Svo fór ég að vinna í TESOL gráðunni. Leiðbeinandinn minn hafði sent mér póst og hrósaði mér fyrir vel unna síðustu einingu sem ég var ánægður með. Ég kláraði aðra einingu í kvöld (nr. 13 af 20). Ég borðaði kvöldmat með vinkonu minni á fljótrétta veitingastað hérna rétt hjá heimili mínu. Það var tofu, grænmeti og smá kjöt og auðvitað hrísgrjón sem maður sporðrenndi. Núna þarf ég svo að fara að sofa þar sem það er skóli og vinna á morgun.

Um daginn keypti ég þessi fallegu jarðarber uppi í skóla og mangó. Mér fannst þessi jarðarber alveg mergjuð og mangóarnir fullkomlega þroskaðir. Það er mikið af ávaxtasölum í skólanum og í kringum skólann og þykir mér mikilvægt að versla jarðarber og banana hjá þessu fólki. Þetta er ódýrt, gott og þægilegt.